Español
Despois de darnos a benvida a todos, a nosa anfitrioa realizounos un percorrido pola totalidade das magníficas estancias do concello, edificio do século XVIII, ademais de irnos presentando a todos os concelleiros, técnicos e funcionarios da corporación. Finalizada a visita, xa no seu despacho, houbo unha breve reunión para charlar de diversos temas, como do noso MELGA, as súas actividades e, sobre todo, da impresión causada aos seus tres compañeiros de partido polo noso museo situado en Ponteceso, así como das ganas que tiña ela de coñecelo persoalmente, emprazándose para iso pasadas as festas do Nadal.
Trala visita institucional, María Barral acompañounos nun breve “circuíto” para coñecer o concello antigo, o centro histórico, o impresionante Centro Internacional da Estampa Contemporánea e, finalmente, O Pasatempo.
Como a mañá foi intensa, para repoñer forzas, o xantar tivo lugar no restaurante San Andrés, onde proseguiron, en boca dos presentes, os temas políticos, monumentais e museísticos, non deixando de degustar, por suposto, a arquicoñecida e magnífica “Tortilla de Betanzos”. Durante a sobremesa, tanto María como Ricardo intercambiaron recordos de cada unha das súas institucións.
Antes da despedida, pasadas as 17:00 h, a promesa de ir visitar o museo era un feito pola súa banda, pero tamén tentaría “implicar” a todos os seus compañeiros do pleno para coñecer o MELGA pontecesán. Pola nosa banda, transmitímoslle que será unha gran honra recibilos a todos, e a nosa gratitude inmensa a Manuel, Antolín, Moncho e María polo acollemento recibido, pola proximidade e polas mostras da súa amizade. Sen dubidalo, un gran día!
Leave A Comment