Avós e netos de Ponteceso réndense aos vellos xogos

Á espera de que rematen os traballos para ordenar, dar forma e presentar o tesouro en forma de xoguetes que garda a planta baixa do centro cultural de Ponteceso, unha pequena mostra deses artiluxios viu onte xa a luz grazas a unha exposición temporal que se poderá visitar ata finais da próxima semana. Non é máis ca un pequeno aperitivo temporal do que ofrecerá, cando abra as súas portas alá pola primavera do 2012 nese mesmo recinto pontecesán -pero nun espazo moito más amplo- o futuro Museo Etnolúdico Galego (Melga).

«Enredos, xogos e deportes tradicionais galegos», enumera o profesor, investigador, divulgador e futuro director do Melga, Ricardo Pérez y Verdes, para desvelar o contido da pequena mostra -arredor de 250 pezas- que conforman esta exposición temporal, coa que espera facer gozar por igual a grandes e pequenos. «O importante -di- é a comunión entre netos e avós».

Os distintos tipos de bolos tradicionais galegos, as peonzas -«hai catro variedades»-, as canicas, os aros e demais trebellos infantís que Pérez Verdes -coa axuda dalgúns dos seus alumnos- foi atopando por toda Galicia durante décadas de estudo dos xogos e xoguetes tradicionais sosteñen este primeiro avance dun proxecto moito máis ambicioso.

«Esta mostra está centrada en Galicia, pero o Melga ocuparase da historia do xogo a través dos tempos e das distintas civilizacións». Mentres tanto, o público pode gozar xa -de 09.00 a 14.00 horas- deste avance tamén variado no que conviven «xogos de habilidade, de forza, de precisión e de lanzamento a longa distancia».

Cedé e carreira

A mostra forma parte dos actos organizados pola Fundación Pondal, o Concello e outras entidades locais para celebrar o trinta aniversario da colocación do monolito pondaliano.

Dentro dese mesmo programa, para onte pola noite estaba prevista a presentación do cedé de música tradicional A Escote, gravado polos grupos Fol de Veneno e Media Ducia.

E para hoxe está programada a segunda edición do Ponteaventura Raid Concello de Ponteceso, unha carreira de orientación e resistencia na que tomarán parte 180 deportistas (agrupados en 58 equipos), que deberán percorrer 80 quilómetros a pé, en bici e kaiak. Os deportistas sairán da praza do Relleno ás dez da mañá. A entrega de trofeos será ás 21.00 horas.

Fuente: La Voz de Galicia