O Melga participa en Cee na Semana Mundial do Teatro

No día de onte sábado 20 do presente mes de marzo, ás 12 h. do mediodía, no teatro municipal de Ceé, sito na Casa da Cultura, o noso director do Museo Etnolúdico de Galicia ( MELGA) Ricardo Pérez e Verdes, foi convidado polo concello cense, así como polo grupo de teatro profesional local Talía Teatro, a dar unha conferencia sobre os xogos e deportes tradicionais, na semana Mundial do Teatro, que cada ano realízase na devandita localidade, con diferentes actividades programadas.

A presentación do relatorio correu a cargo do actor e director da compañía Artur Trillo, organizador da festa anual. O público asistente ao acto, escoitou con atención a disertación do conferenciante, co título “O mundo dos xogos e os xogos do mundo”. A mesma estivo enmarcada en tres apartados. O primeiro deles versou sobre o xogo e as súas aplicacións xerais, as súas teorías educativas, sociolóxicas, fisiolóxicas, antropolóxicas, filosóficas, etc., as súas aplicacións a cada dade, adecuación dos xoguetes,…es dicir, unha contextualización do termo polisémico do xogo. En segundo lugar expuxo unha revisión histórica dos xogos do mundo a través dos tempos e finalmente un epílogo onde se lanzaron as diferentes reflexións posibles sobre a temática tratada e as súas conclusións.

A charla estivo sempre acompañada dunha extensa cantidade de imaxes e ao mesmo tempo, todos os presentes presenciaron unha pequena exposición de xogos antigos, ao redor de medio centenar, pertencentes aos fondos do museo pontecesan e algúns nenos e nenas presentes puideron practicar con algúns deles no propio recinto do auditorio teatral.

Xa pola tarde, ás 18,00 h. presentouse a obra teatral “Voa, voa”, cuxa trama argumental consistía, en que un neno e unha nena situados nun parque de calquera cidade, a través das súas conversacións e ” cuitas”, retábanse a descifrar adiviñas, cancioncillas e a xogar a diferentes xogos tradicionais galegos, moitos deles, esquecidos pola maioría de nós. O autor da obra foi Artur Trillo, os actores Toño Casais e María Ordoñez e a compañía Talía Teatro. A obra infantil, aínda que tamén para adultos e maiores, foi un gran éxito, tanto no texto como nas magníficas actorais dos protagonistas.

XOGOS E TEATRO unha óptima combinación para levar a nosa CULTURA ás máis altas cotas de engrandecimiento patrimonial. Outra nova experiencia que o MELGA puido realizar, aínda que fóra en tempos de pandemia. A fusión será un feito por toda Galicia e como non, sería o noso máximo desexo, que a próxima cita podería ser real na vila de Ponteceso.