Español
Un numeroso grupo de persoas maiores, entre os 60 e 80 anos de idade, chegaron onte pola mañá mércores día 16 do presente mes de xullo a Ponteceso, para visitar por primeira vez o Museo Etnolúdico de Galicia (MELGA). A actividade foi organizada pola empresa ESPROADE do Burgo-Culleredo (A Coruña) e os excursionistas procedían das aldeas de Bertamiráns e Milladorio do concello de Ames da provincia da Coruña.
A expedición formábana preto de noventa persoas (87), das cales correspondían o 50% de cada un dos municipios antes devanditos. As mulleres eran a maioría sobre o 80 % e os homes o 20%. O grupo viña acompañado polas monitoras Yahumars Canedo e Mónica García, que exercía de representante da empresa na visita.
Ao ser tan numeroso, o mesmo dividiuse en dous subgrupos, mentres un atopábase coa guía do museo Vanessa Casais, o outro grupo correspondíalle ao noso director. Despois dunha hora en cada sala, os mesmos rotaron para coñecer a totalidade do museo.
Debido ás idades dos visitantes, despois dun breve descanso, a duración do percorrido foi superior ás dúas horas. Hai que destacar que a maioría das persoas recibidas escoitaron con moita atención as explicacións que alí se lles expoñía e por suposto, non deixaron de participar nos diferentes xogos tradicionais adaptados planificados.
Unha xornada lúdico-recreativa moi especial, aínda que moi numerosa e con pouco tempo para gozar ao máximo, aínda que como comentaban: “Isto é un aperitivo, xa que repetiremos coa familia para gozar e lembrar todos aqueles tempos pasados da nosa infancia”. Fomos agraciados coas súas felicitacións afagos, por darlles un pouco de nostalxia, emocións e felicidade.
Finalizado a visita, a expedición desprazouse ao Piñeiral de Balarés para o xantar e a continuación continuar a visita vespertina polos arredores do concello de Ponteceso (Corme, Roncudo, Pedra da Serpe, Monte Branco etc.)
Un día completo pola nosa vila pondaliana, que moitos deles descoñecían e a súa impresión foi inmellorable!
Leave A Comment